第一百六十八回 假纏綿愛語穩痴人

真懊惱芳心乖宿願

只說沈二寶推著金姐的背叫他出去，金姐知道這個時候大功已成，便呵呵的笑著走了出去。潘侯爺見他走了，自然要和沈二寶親熱一番，軟語溫存，柔情婉轉，那相愛的情愫自然是十分熨貼，百倍纏綿，也不必去說他的了。

到了明天，潘侯爺拿著一張四千塊錢的莊票，要給沈二寶還債，卻婉婉的對他說道：「你不肯拿我的錢，自然是和我真心要好。但是這個裡頭也有一個分別，若是你不欠甚麼債務，有心敲我的竹槓問我要錢，自然對我不起。如今你委實欠了一身的債，我又不是沒有錢的人，我們兩個人這樣的交情，理應和你代還債項，算不得是敲我的竹槓。況且是我自家願意給你，又不是你問我索取的，你受了怕甚麼？」

沈二寶聽了，正顏厲色的說道：「潘大人，阿有處請耐照應點倪，勿要實梗。倪欠別人家格銅鈿末，等倪自家去想法子。耐要搭倪還債末，慢慢叫末哉，故歇用勿著。」

潘侯爺見他說得這樣侃侃鑿鑿的定不肯受，心上更加欣服，暗想：如今上海堂子裡頭居然也有這樣的人。便也正色問道：「你一定不肯受我的錢，究竟是個甚麼道理？你倒要講給我聽聽！難道你剪我不起，所以不要受我的錢麼？」沈二寶把金蓮一頓道：「耐格人真正纏煞哉！倪要看耐勿起末，也勿要搳脫仔幾幾化化客人，獨做耐一千仔哉嘛！」潘侯爺道：「既然不是嘛我不起，為甚麼不肯受我的錢？」

沈二寶呆著個臉不肯說。潘侯爺再三追問，方才嘆一口氣道：「老實搭耐說仔罷，倪格做耐潘大人，勿是為啥銅鈿，也勿是為啥勢利。格辰光倪搭耐剛剛碰頭，心浪向就有仔耐實梗一個人，一徑丟耐勿脫。耐吃仔一台酒，一徑勿來，倪心浪末牽記煞，面孔浪末說勿出。倪碰著格客人幾幾化化，一塌刮仔才勿來浪倪心浪。獨獨看見仔耐，像煞心浪有一種說勿出格念頭，總歸耐說一句閒話，跑一步路，你看仔總歸嘸啥勿對勁。格個里向，連搭仔倪自家也說勿出是啥格講究。直到仔今年馬路浪碰著仔耐，承耐格情看倪得起，搭倪也蠻要好，別人家看仔倪兩家頭總說嘸啥希奇，洛里曉得倪心浪格事體。老實說，耐要倪那哼，只要耐說一聲，倪總嘸啥勿肯。故歇耐曉得倪欠仔虧空，搭倪還債，撥別人家看起來，好象倪搭耐要好才是假格，為仔自家欠仔別人家格債，嘸說法洛，有心騙耐搭倪要好，叫耐搭倪還債。耐想撥俚篤一說，倪阿要難為情。就是耐自家心浪想起來，也要勿相信格呀！總當仔倪搭金姐兩家頭串通仔調耐格槍花，倪就生仔一百張嘴，也搭耐講勿明白嘛。實梗洛倪情願自家去想法子，勿要搭倪還啥格債，等別人家看看倪到底阿是格號只認得銅鈿勿認得人格人。」

這幾句話兒，真個說得來恩上加恩，愛中添愛。潘侯爺聽了，不由得滿面添花的道：「你的話雖然不錯，但是你現在欠著別人的債項，這是講不來的。我不知道也還罷了，我既然知道了，這件事情那有不和你還的道理？若是你一定不肯受，那就倒反不是真心和我要好，好象是假意撇清的了。」沈二寶聽了，低著頭沈吟一會，嘆一口氣道：「說起來，倪做仔生意，客人撥倪洋鈿，阿有啥勿要格道理？不過今朝拿仔耐格洋鈿，撥別人家說起來，總歸說倪有心做仔圈套，敲耐格竹槓。軋實倪搭耐兩家頭要好，是樣式樣對勁仔格要好，勿是為啥洋鈿勿洋鈿。故歇實梗一來，像煞仔倪想耐格洋鈿洛，格外巴結。軋實倪也勿是格號勿要面孔格人，耐也勿是格號碰碰上當的曲辮子，俚篤洛里曉得？」

潘侯爺聽沈二寶說他不是輕易會上當的曲辮子，心上更覺合拍，便又對他說道：「你的話兒都是多慮，別人說你不是真心和我要好，只顧憑他們去說就是了。只要我自己心上明白，別人的講論何必再去管他？如今你的真心我也知道的了，若要叫我看著你欠了一身的債，不來和你想個法兒，非但我心上過不去，你叫我的面子上也怎麼的下得去？你們當倌人的人若真個一個錢不要，又何必要做甚麼生意？」

沈二寶正色道：「潘大人，耐倒勿要實梗說。倪吃仔格碗把勢飯，做客人也有幾等幾樣做法格呀！老實搭耐說，格個客人要是搭倪勿對勁格，等俚去多用脫兩個銅鈿，心浪像煞開心點。碰著仔搭倪對勁格客人，像煞俚多用仔一個銅鈿，倪心浪總歸有點勿舒齊。勿是啥吃仔把勢飯，就拿銅鈿買得動格。買倪格身體倒嘸啥希奇，要買倪格心倒勿容易嚏！耐總當仔倪做倌人格末，總歸只認得銅鈿，勿認得交情，格末耐真正看錯仔人哉！」